КЪОСТА


Ныстуан  Сагъæс  Ныфс  Фесæф  Зонын  Æнæ хай



НЫСТУАН

Ныббар мын, кæд-иу дæм мæ зарæг,
Кæуæгау фæкæса, мыййаг,-
Кæй зæрдæ нæ агуры хъарæг,
Уый зарæд йæхи фæндиаг!..

Æз дзыллæйы къаддæр куы дарин,
Куы бафидин искуы мæ хæс,
Уæд афтæ æнкъардæй нæ зарин,
Нæ хъуысид мæ кæуын хъæлæс...

NYSTUAN

Nybbar myn, kæd-iu dæm ma zaræg,
Kæuægau fækæsa, myyyag,-
Kæy zærdæ næ agury h'aræg,
Uyy zaræd yæhi fændiag!..

Æz dzyllæyæ k'addær kuy darin,
Kuy bafidin iskuy mæ hæs,
Uæd aftæ ank'ardæy næ zarin,
Næ h'uysid mæ kæuyn h'ælæs....

й

Сагъæс

Мæ удыл хæцæг
Æнæ æнцой уа,
Мæ мады зæнæг
Мæ мардыл кæуа!

Куыд зæхмæдзыд дæн,
Куыд фыдуаг хæссын,-
Мæ фыдæн фыртæн
Цæуылнæ бæззын?

Хъæубæстæй - хъоди,
Æмгартимæ - сырд,
Ныхасы - гоби,-
Нæ мæ хауы дзырд.

Мæ зонд, мæ фæндыл
Нæ лæууы кæстæр,
Кæстæр мæ фæдыл
Нæ цæуы хæстмæ.

Бæсты сæрвæлтау
Нæ кæлы мæ туг,
Хæссын,къæлæтау,
Цагъайраджы дуг!..

SAG'ÆS

Mæ udyl hætsæg
Ænæ æntsoy ua,
Mæ mady zænæg
Mæ mardyl kæua!

Kuyd zæhmædzyd dæn,
Kuyd fyduag hæssyn,-
Mæ fydæn fyrtæn
Tsæuylnæ bæzzyn?

H'æubæstæy - h'odi,
Æmgartimæ - syrd,
Nyhasy - gobi,-
Næ mæ hauy dzyrd.

Mæ zond, mæ fændyl
Næ læuuy kæstær,
Kæstær mæ fædyl
Næ tsæuy hæstmæ.

Bæsty særvæltau
Næ kæly mæ tug;
Hæssyn, k'ælætau,
Tsag'ayradjy dug!..

й

НЫФС

Тызмæгæй мæм ма кæс,
Мæ фыды зæронд,
Дæ зæрдæмæ ма хæсс
Мæ зæрдæйы конд!

Йæ фыды фæндиаг
Кæм вæйы фырт дæр?-
Лæппуйæ рæдиаг
Нæ вæййы æвзæр!

Дæ номыл, дæ кадыл
Нæ барын мæхи,-
Ныууадз мæ мæ адыл,-
Фæндон хорз кæм и!?

Æз топпæй нæ хъазын,
Æз барæг нæ дæн;
Æхсаргард ысласын
Мæ бон нæу мæнæн...

Фæхудæнт мыл хъалтæ
Ды се'мбал нæ дæ!
Мæ гутон, мæ галтæ -
Мæнæн дæр цæттæ!

Мæ гутон, мæ галтæ -
Мæ фæндыр, мæ зонд;
Мæ кадæг, мæ зарæг -
Мæ цард хоры конд.

Нæ дзыллæйы зæрдæ -
Мæ хуымгæнды хай;
Нæ бæсты сагъæстæ -
Мæ фæззыгон най...

Дзаг хорæй мæ хордон,
Бæркадджын мæ зæхх,
Хæдтулгæ мæ уæрдон,
Мæ фæндаг уæрæх...

Мæгуырæй мын ма тæрс,
Мæ фыды зæронд,-
Дæ зæрдæмæ ма хæсс
Мæ зæрдæйы конд!..

NYFS

Tyzmægaey mæm ma kæs,
Mæ fydy zærond,
Dæ zærdæmæ ma hæss
Mæ zærdæyy kond!

Yæ fydy fændiag
Kæm væyyy fyrt dær?-
Læppuyæ rædiag
Næ væyyy ævzær!

Dæ nomyl, dæ kadyl
Næ baryn mæhi,-
Nyuuadz mæ mæ adyl,-
Fændon horz kæm i!?

Æz toppæy næ h'azyn,
Æz baræg næ dæn;
Æhsargard yslasyn
Mæ bon næu mænæn...

Fæhudænt myl h'altæ
Dy se'mbal næ dæ!
Mæ guton, mæ galtæ-
Mænæn dær tsættæ!

Mæ guton, mæ galtæ-
Mæ fændyr, mæ zond;
Mæ kadæg, mæ zaræg-
Mæ tsard hory kond.

Næ dzyllæyy zærdæ-
Mæ huymgændy hay;
Næ bæsty sag'æstæ-
Mæ fæzzygon nay...

Dzag horæy mæ hordon,
Bærkaddjyn mæ zæhh,
Hædtulgæ mæ uærdon,
Mæ fændag uæræh...

Mæguyræy myn ma tærs,
Mæ fydy zærond,-
Dæ zærdæmæ ma hæss
Mæ zærdæyy kond!..

й

ФЕСÆФ

Фесæф, фесæф, цард,
Сау лаппуимæ,
Тагъд дæлзæхх фæу
Ме'намондимæ!-

Калмау мын мæ риу
Судзгæ баууылдта
Маст - зæрдæхалæн,
Йæ тых басæтта!

Афæлывтæ мæ
Сауæрфыг рæсугъд...
О, мæ худинаг,
О, мæгуыр мæ уд!..

Дзырд хуыцауы раз
Радта иннæмæн,-
Къухæй нал ласы
Ныр йæ къухдарæн...

Гъей, чызгай, цæмæн
Афæлывтай мæн?!
Цæй, дæ хуыцау дын
Уæд тæрхонгæнæг!..

Даргъ хæххон зымæг,
Уалдзыгон бонау,
Ныр æрымысын
Аæ, фынфенæгау...

Кæд кæрæдзийы
Фаг нæ рæвдыдтам?
Кæд кæрæдзийæн
Фаг нæ фæдзырдтам

Уарзон ныхæстæ,
Цард анкъæлæджы?!..
Гъей, цы хъал уыдтæн
Уыцы рæстæджы!..

Ныр дæу чи хæссы,
Уый йæ лæджыхъæд
Мемæ бавзарæд,
Кæд хуыздæр у, уæд!

Йе - йæ топпæй хъазт,
Йе - йæ бæхыл бадт,
Йе - йæ кæсгон кафт,
Йе - йæ цæгъдгæ зард!..

Дæу сырх дарийæ
Хорз ысфæлыста!
Дæу сызгъæрин рон
Нарæг балвæста!..

Риуы 'гънæджытæ
Хъазынц стъалытау...
Уæд дæ хæрдгæ хуыд,
Уæд дæ алы 'гъдау!..

Фесæф, фесæф, цард,
Сау лаппуимæ,
Тагъд далзæхх фæу
Ме'намондимæ!

Калмау мын мæ риу
Судзгæ баууылдта
Маст - зæрдæхалæн,-
Йæ тых басæтта!

FESÆF

Fesæf, fesæf, tsard,
Sau læppuimæ,
Tag'd dælzæhh fæu
Me'namondimæ!-

Kalmau myn mæ riu
Sudzgæ bauuyldta
Mast - zærdæhalæn,
Yæ tyh basætta!

Afælyvta mæ
Sauærfyg ræsug'd...
O, mæ hudinag,
O, mæguyr mæ ud!..

Dzyrd huytsauy raz
Radta innæmæn,-
K'uhæy nal lasy
Nyr yæ k'uhdaræn...

G'ey, chyzgay, tsæmæn
Afælyvtay mæn?!
Tsæy, dæ huytsau dyn
Uæd tærhongænæg!..

Darg' hæhhon zymæg,
Ualdzygon bonau,
Nyr ærymysyn
Æz, fynfenagau...

Kæd kærædziyy
Fag næ rævdydtam?
Kæd kærædziyæn
Fag næ fædzyrdtam

Uarzon nyhæstæ,
Tsard ænh'ælædjy?!..
G'ey, tsy h'al uydtæn
Uytsy ræstædjy!..

Nyr dæu chi hæssy,
Uyy yæ lædjyh'æd
Memæ bavzaræd,
Kæd huyzdær u,uæd!

Ye - yæ toppæy h'azt,
Ye - yæ bæhyl badt,
Ye - yæ kaægon kaft,
Ye - yæ tsæg'dgæ zard!..

Dæu syrh dariyæ
Horz ysfælysta!
Dæu syzg'ærin ron
Naræg balvæsta!..

Riuy 'g'nædjytæ
H'azynts st'alytau...
Uæd dæ hærdgæ huyd,
Uæd dæ aly 'g'dau!..

Fesæf, fesæf, tsard,
Sau læppuimæ,
Tag'd dældzæhh fæu
Me'namondimæ!

Kalmau myn mæ riu
Sudzgæ bauuyldta
Mast - zærdæhalæn,-
Yæ tyh basætta!

й

ЗОНЫН

Зонын, æфсæрмæй кæудзыстут,
Бавæрдзыстут мын мæ мард,
"Рухсаг у, рухсаг,- зæгъдзыстут,-
Ницæмæн уал уыд дæ цард!"

Зонын, æргæвддзыстут исты,-
Мардыл ма чи дары ком?-
Алчи æфсæстæй мæ хисты
Ссардзæн арахъæй мæ ном.

Иу бон æгъгъæд у мысынæн,
Иу бон кæндзыстут мæ дзырд,
Уый фæстæ ферох уыдзынæн,-
Ничи уал зондзæн мæ цырт.

ZONYN

Zonyn, æfsærmæy kæudzystut,
Baværdzystut myn mæ mard,
"Ruhsag u, ruhsag,- zæg'dzystut,-
Nitsæmæn ual uyd dæ tsard!"

Zonyn, ærgævddzystut isty,-
Mardyl ma chi dary kom?-
Alchi æfsæstæy mae histy
Ssardzæn arah'æy mæ nom.

Iu bon æg'g'æd u mysynæn,
Iu bon kændzystut mæ dzyrd,
Uyy fæstæ feroh uydzynæn,-
Nichi ual zondzæn mæ tsyrt.

й

ÆНÆ ХАЙ

Мæ Иры фæсивад! Дæ цинæй, дæ хъыгæй
Фæластон мæ сау зæрдæ дард...
Цы ма мын кæндзынæ?-дæ цæстыты сыгæй
Æнæ хай фæуыдзæн мæ мард!..

Æцæгæлон адæм, æцæгæлон бæстæ
Æхсныфæй нуазынц мæ туг...
Мæлæтæй нæ тæрсын, фæлæ мын мæ фæстæ,
Мæ уæлдæрмæ чи хæсдзæн суг?

Кæй чызг мыл ыскæндзæн зæрдæхалæн хъарæг,
Кæй кæуынаей риздзæн къæдзæх,
Кæй фæндыр ысцæгъддзæн мæ иунæджы зарæг,
Чи уадздзæн мæ дугъы йæ бæх?

Мæ Иры фæсивад! Дæ цинæй, дæ хъыгæй
Фæластон мæ сау зæрдæ дард...
Цы ма мын кæндзынæ?-дæ цæстыты сыгæй
Æнæ хай фæуыдзæн мæ мард!..

ÆNÆ HAY

Mæ Iry fæsivad! Dæ tsinæy, dæ h'ygæy
Fælaston mæ sau zærdæ dard...
Tsy ma myn kændzynæ-dæ tsæstyty sygæy
Ænæ hay fæuydzæn mæ mard!..

Ætsægælon adæm, ætsægælon bæstæ
Æhsnyfæy nuazynts mæ tug...
Mælætæy næ tærsyn, fælæ myn mæ fæstæ,
Mæ uældærmæ chi hæsdzæn sug?

Kæy chyzg myl yskændzæn zærdæhalæn h'aræg,
Kæy kæuynaey rizdzæn k'ædzæh,
Kæy fændyr ystsæg'ddzæn mæ iunædjy zaræg,
Chi uadzdzæn mæ dug'y yæ bæh?

Mæ Iry fæsivad! Dæ tsinæy, dæ h'ygæy
Fælaston mæ sau zærd? dard...
Tsy ma myn kændzynæ-dæ tsæstyty sygæy
Ænæ hay fæuydzæn mæ mard!..
 

й