— Хуыцау, табу Дæхицæн, Хуыцау!
— Оммен, Хуыцау!
— Хуыцау, мæнæ ацы кувæг адæм — Дæ фæдзæхст, Де уазæг!
— Хуыцау, нæ сыгъдæг нывондæй арæм Мигъдауы рухс дзуæртты ном æмæ сын барст уæд.
— Фæндагсар Уастырджи, ацы адæмæй дæ бынты чи цæуа, рæствæндаг-иу сæ фæкæн!
— Ахæм хъару нын ратт, æмæ ныл знаг куыд никуы фæуæлахиз уа!
— Тхосты дзуар, фыдбылызæй нæ бахиз!
— Реком, дæ хорзæх нæ уæд!
— Уацилла, ахæм хорæрзад ратт, хорæфсævст куыд уæм!
— Хуыцауы дзуар, æдзух Стыр Хуыцауы раз вæййыс, ракур дзы, йæ хорзæх нæ куыд уа!
— Цъамады Хъæузæд, кувæм дæм, ацы хъæу — де уазæг, фыдбылызæй йæ бахиз!
— Аларды, дæуæн дæр æхцон фæуæд!
Дæ чъылдыммæ дын кувдзыстæм, де 'ргом нæм ма раздах.
Де 'ргом нæм куы раздахай, уæд та нæ хъæлдзæг зæрдæтимæ ныууадз.
— Рыны бардуаг, нæ адæмæн дæр æмæ нæ фосæн дæр сæ низтæ фæсур, уый курæг дæ стæм!
— Мады Майрæм, фыдæлты дзуар дæ æмæ нæ фыдæлты амондæй æнæ хай ма фæкæн.
Кæмæн кæй радтай, уый цæринаг уæд!
— Мыкалгабыр, дæуæн дæр нæ кувинаг барст фæуæд. Фыдбылыз-иу дард акæн, амонд — хæстæг. Бæркад дæттæг дæ æмæ нын нæ куысты бирæ бæркад ратт!
— Стыр Тутыр, уый курæг дæ стæм — нæ фосы 'рдæм дæ бирæгътæ дургом куыд уой!
— Уæдæ, Фæлвæра, нæ фос дæ бар сты. Фылдæрæй фылдæр нын сæ кæн! Хуыцау æмæ дзуæртты бæрæгбæтты нæ бон кусарт кæнын куыд уа!
— Сауы дзуар, нæ хъæдтæ хуыскъ æмæ зынгæй бахиз!
— Бынаты Хицау, нæ бынæтты нын хорз æмæ æнæниз цард ратт!
— Хурæртхурон, Хуыцаумæ цæуагг дзуар дæ, æмæ дæ курæм:
Иæ бирæ хорздзинæдтæй нæ хайджын фæкæнæд!
— Стыр Иунæг Кадджын Хуыцау, Дæуæн — æхцон, махæн — æнцон! Нæ куывдтытæ нын айс!
— Цы дзуæртты кой не скодтам, уыдонæй хуыздæр арфæ чи ракæндзæнис,
Уый хорзæх дæр нæ уæд!
— Афтæмæй уæ Стыр Хуыцауы хорзæх уæд!
— Оммен, Хуыцау!
